5000 illik elit qadın məzarı tapıldı - VİDEO

Peru sahillərində arxeoloqlar qədim Karal sivilizasiyasının yuxarı təbəqələrinə aid ola biləcək 5000 yaşlı qadının qalıqlarını aşkar ediblər.

Publika.az xəbər verir ki, bu barədə "Reuters" agentliyi məlumat yayıb.

"Bu, mühüm dəfndir, çünki yüksək statuslu qadına uyğun elementləri ehtiva edir", - deyə Arxeoloq David Palomino bildirib.

Mütəxəssis cəsədin necə sarıldığını, dərisinin, saçının və dırnaqlarının qorunmasına diqqət çəkib. 20-35 yaşları arasında dünyasını dəyişən qadının cəsədi Amazon tutuquşularına aid ola biləcək göy və qəhvəyi rəngli lələklərdən ibarət xalatla örtülmüş vəziyyətdə tapılıb. Üstəlik, məzarın ətrafı qurban səbətləri, vazalar, balqabaqlar və tukan dimdiyi ilə əhatə olunub.

Perunun paytaxtı Limadan təxminən 180 kilometr məsafədə yerləşən Karal Cənubi Amerikanın ən qədim şəhəri hesab olunur. Qədim Misir, Çin və Şumer sivilizasiyaları ilə eyni vaxtda mövcud olub.

Bundan əvvəl alimlər qədim finikiyalıların və karfagenlilərin DNT-si üzərində geniş miqyaslı tədqiqat aparıb. Araşdırma onların mədəniyyətinin yayılması ilə bağlı bəzi təəccüblü faktları üzə çıxarıb. Məlum olub ki, finikiyalıların məşhur ekspansiyası kütləvi köçlər vasitəsilə deyil, mədəni mübadilə və digər tayfaların assimilyasiyası yolu ilə baş verib.

Adəm