Ölülər və dirilər dünyası arasında qapı: 4700 illik məzardan elə şeylər tapıldı ki... - FOTO

Misirdə arxeoloqlar dünyanın ən məşhur qədim nekropollarından biri olan Sakkarada apardıqları qazıntılar zamanı təxminən 4700 il əvvələ aid məzar aşkarlayıblar.

Publika.az xəbər verir ki, Qahirədən təxminən 40 kilometr cənub-qərbdə yerləşən və UNESCO-nun Ümumdünya İrs Siyahısına daxil edilən Sakkara nekropolunda aşkar olunan məzar Qədim Padşahlıq dövrünə aiddir.

Heroqliflər məzarın Sehenyu-Ptax adlı yüksək vəzifəli məmura məxsus olduğunu göstərir. Onun məzarının üzərində tutduğu vəzifələri də yazılıb. Onların arasında kralın kamerdineri, kral tikintilərinə rəhbərlik edən şəxs, kral sənədlərinə nəzarətçi, Maat ilahəsinin kahini və mirzələrə rəhbərlik edən vəzifələr yer alır.

Məzarın içərisində 100-dən çox fiqur da aşkarlanıb. Qədim misirlilər bu fiqurların ölən şəxsin axirətdəki işlərini yerinə yetirəcək köməkçilər olduğuna inanırdılar.

Arxeoloqlar həmçinin ilkin vəziyyətində möhürlənmiş üç daş sarkofaq, taxtadan hazırlanmış şahin fiquru, keramika və digər qədim artefaktlar tapıblar.

Ən diqqətçəkən tapıntı isə saxta qapının qarşısında yerləşdirilmiş dəfn əşyaları olub. Burada qurban masası, diski və təmizlənmə qabı aşkarlanıb.

Saxta qapı oğruları aldatmaq üçün nəzərdə tutulmayıb. Qədim Misir inanclarına görə, bu qapı dirilər və ölülər dünyası arasında simvolik və mənəvi keçid hesab olunurdu. İnanclara əsasən, mərhumun ruhu bu qapı vasitəsilə iki dünya arasında hərəkət edə bilərdi.

Məzarın minilliklər ərzində talan edildiyi müəyyənləşdirilsə də, arxeoloqların aşkarladığı artefaktlar onun sahibinin yüksək statusunu ortaya qoyur.

Sakkara yalnız bu son tapıntı ilə deyil, qədim Misirin ən mühüm abidələrinin yerləşdiyi ərazi kimi də diqqət çəkir. Burada firon Coserin pilləli piramidası da daxil olmaqla çoxsaylı piramidalar və onların xarabalıqları yerləşir.

Nekropolda qədim Misirin ən qədim və ən yaxşı qorunmuş mumiyalarından biri də aşkarlanıb.

Sakkara nekropolu XIX əsrin ortalarından etibarən araşdırılır. Buna baxmayaraq, ərazi arxeoloqlara hələ də yeni sürprizlər təqdim edir.

Misir hakimiyyəti son illərdə Sakkaranı Giza piramidaları ilə rəqabət apara biləcək böyük turizm və arxeologiya mərkəzinə çevirməyə çalışır. Mütəxəssislərin fikrincə, Sakkara Giza qədər möhtəşəm görünməsə də, tarixi baxımdan daha geniş dövrü əhatə edir.

Misirşünas Magdi Şaker bildirib ki, Gizanın memarlıq və tarixi baxımdan əsasən IV sülalənin piramida kompleksi ilə məhdudlaşmasına baxmayaraq, Sakkarada piramidalar, məbədlər, şəxsi məzarlar, yeraltı heyvan nekropolu və monastır yerləşir. Onun sözlərinə görə, bütün bunlar Qədim Misirin tarixinin demək olar ki, bütün dövrlərini əhatə edir.

Müəllif: Adəm