Rusiyada COVID-ə yoluxma bir həftədə 48,9 faiz artdı

Son bir həftə ərzində Rusiyada koronavirusa yoluxma halları 48,9% artıb.

Publika.az xəbər verir ki, Operativ Qərargahın məlumatına görə, artımlar 70 regionda qeydə alınıb, onlardan 15-də xəstələnmə ölkə üzrə orta göstəricidən çoxdur.

Eyni zamanda, hər 100 min nəfərə düşən xəstəxanaya yerləşdirilənlərin sayı 5,3% azalıb. Xəstəxanaya yerləşdirilənlərin sayında artım 29 regionda aşkar edilib.

Rusiyada son sutka ərzində 6571 koronavirusa yoluxma faktı qeydə alınıb. Bu, əvvəlki gündən (7523) 12,6% azdır. Gündəlik xəstəxanaya yerləşdirilənlərin sayı əvvəlki rəqəmdən (757) iki nəfər çox olmaqla 759 nəfər olub.

Rusiyada gün ərzində 34 nəfər ölüb ki, bu da dünənlə müqayisədə 3 nəfər azdır (37). Ölənlərin əksəriyyəti Sankt-Peterburq (8) və Moskvada (7) olub. Ölənlərin ümumi sayı 382 189 nəfərə çatıb. Sutka ərzində 4 234 nəfər sağalıb, ümumilikdə 17 942 908 nəfər sağalıb.

İyulun 1-dən Rusiya koronavirusa görə tətbiq etdiyi bütün məhdudiyyətlər aradan qaldırılıb. Bu ay ölkədə omikron ştammının yeni, daha yoluxucu subvariantı olan “kentavr”a ilk yoluxma halları müəyyən edilib. “Roszdravnadzor” regionlarda peyvəndin bərpasını tövsiyə edib.

Səxavət