Son illərin ən böyük zərbəsi: Ordu hücuma keçdi, 1732 əməliyyat keçirildi

Yəmən ordusu husilərə qarşı həyata keçirilən “Yəmən Şəfəqi” əməliyyatı çərçivəsində 1732 hərbi əməliyyatın keçirildiyini açıqlayıb.

Publika.az xəbər verir ki, Yəmən Silahlı Qüvvələrinin sözçüsü, polkovnik Macid Abdullah ən-Nezili əməliyyatlar zamanı 900-dən çox husi döyüşçüsünün zərərsizləşdirildiyini, 287-dən çox hərbi texnikanın isə məhv edildiyini və ya sıradan çıxarıldığını bildirib.

Onun sözlərinə görə, hücumlarda döyüş təyyarələrindən, pilotsuz uçuş aparatlarından, səhra artilleriyasından və reaktiv yaylım atəşi sistemlərindən istifadə olunub. Husilərin istehkamları, komanda-idarəetmə mərkəzləri, müşahidə məntəqələri və silah-sursat anbarları hədəfə alınıb.

Əməliyyatların keçirildiyi ərazilər və dəqiq vaxt aralığı açıqlanmayıb. Husilər isə məsələ ilə bağlı hələlik münasibət bildirməyiblər.

Yəmən Prezidentlik Şurasının rəhbəri Rəşad Məhəmməd əl-Uleymi oktyabrın 5-də husilərin nəzarətindəki ərazilərin geri alınması məqsədilə genişmiqyaslı hərbi əməliyyatlara başlanıldığını açıqlamışdı.

Yəməndə vətəndaş müharibəsi husilərin 2014-cü ilin sentyabrında paytaxt Səna və bir sıra vilayətləri ələ keçirməsindən sonra başlayıb. 2015-ci ilin martında Səudiyyə Ərəbistanının rəhbərlik etdiyi koalisiya Yəmən hökumətinə dəstək məqsədilə ölkəyə müdaxilə edib.

Akqabay