Uzun müddət enerji daşıyıcılarımıza Avropada tələbat olacaq – Elşad Məmmədov

Hələ uzun müddət bizim enerji daşıyıcılarımıza Avropada tələbat olacaq.

Bu sözləri Publika.az-a açıqlamasında iqtisadçı alim Elşad Məmmədov Prezident İlham Əliyevin Münxendə “Enerji təhlükəsizliyi” mövsuzunda keçirilən dəyirmi masada çıxışı ilə bağlı danışarkən deyib.

Azərbaycanın tələb olunan bütün investisiya layihələrində iştirak etdiyini vurğulayan alim bildirib ki, ölkəmiz eyni zamanda bir sıra layihələrin demək olar ki, təşəbbüskarı olub:

"Həm neft, həm də qaz seqmenti üzrə Azərbaycan bu prosesə qoşuldu. Faktiki olaraq artıq qeyd etmək olar ki, bizim 15 ilə yaxındır ki, Avropanın neft istehlakında rolumuz var. Cənub Qaz Dəhlizinin reallaşdırılması da Azərbaycanın bu seqment üzrə mövqeləşməsinə şərait yaradır. Böyük dövlətlərlə müqayisədə ölkəmizin imkanları Avropanı qaz və neft istehlakında təmin etməkdə sözsüz ki, azdır. Ancaq bir məqama da toxunmaq lazımdır ki, biz qaz idxalı üzrə ilk 5 dövlətdən biriyik. Bizim üçün maraqlı olan milli iqtisadiyyatımızın bundan əldə etdityi resurslardır. Bu gün də Azərbaycanın ixracatında neft 90 faizə yaxın təşkil edir. Qaz üzrə ixracdan isə illik 3 milyard dollara yaxın vəsait əldə edəcəyik. Bu da iqtisadiyyatın digər prioritet sahələrinə yönlənmək üçün şərait yaradır”.

İqtisadçı OPEK+ formatından da danışıb: “Azərbaycanın OPEK + iştirakçılarının əksəriyyətindən fərqli olaraq, iqtisadi cəhətdən itirdiyi mənfəət cüzidir. Ona görə də burada Azərbaycanın götürdüyü öhdəliklər bizim milli iqtisadiyyatımıza cidddi mənfi təsir göstərmir. OPEK+ formatı uzunmüddətli bir proses deyil. Ona görə də, artıq bu gün Rusiyada, Səudiyyə Ərəbistanında və bu formatın digər əsas iştirakçılarında da ciddi şəkildə müzkirələr gedir. Çünki formatın zərəri tədricən o dövlətlər üçün artmaqdadır. Ona görə də hesab edirəm ki, OPEK+-a çox güvənmək lazım deyil. Çünki bu format dayanıqlı format kimi ola bilməz”.

Tağı Həsənov