Putin təyyarə qəzasından danışdı: Tokayevlə razılığa əsasən...

Rusiya Fövqəladə Hallar Nazirliyinə məxsus göyərtəsində tibb işçiləri və lazımi əlavə avadanlıqlar olan təyyarə qəzanın baş verdiyi Aktauya uçur.

Publika.az xəbər verir ki, bunu Rusiya prezidenti Vladimir Putin Sankt-Peterburqda keçirilən qeyri-rəsmi MDB sammitinin əvvəlində bildirib.

“Təyyarə qəzaya uğradı, ölənlər var, çoxlu yaralı. Mən sizin adınıza (MDB dövlət başçıları adından – red.) həlak olanların ailələrinə və bütün yaralılara başsağlığı vermək istəyirəm”, - Putin bildirib.

“Qazaxıstan Prezidenti ilə razılığa əsasən, Rusiya Fövqəladə Hallar Nazirliyinin təyyarəsi tibb personalı və göyərtəsində lazımi əlavə avadanlıqla birlikdə Aktauya uçur. Biz yaralıların tezliklə sağalacağına ümid edirik və əlbəttə ki, hərtərəfli təhqiqat aparılacağına əminəm. Bu faciə ilə bağlı bütün məsələlərdə xüsusi aviasiya xidmətlərimizin işini razılaşdıracağıq”, - Putin əlavə edib.

Xatırladaq ki, Azərbaycan Hava Yolları aviaşirkətinin J2-8243 nömrəli Bakı-Qroznı reysini yerinə yetirən “Embraer 190” təyyarəsi Aktau şəhərinin 3 km yaxınlığında qəzaya uğrayıb. Təyyarədə 62 sərnişin, 5 ekipaj üzvü olub.