Uğurlarımız onları qıcıqlandırır - Putin

"Rusiyanın uğurları rəqiblərini getdikcə qıcıqlandırır".

Publika.az xəbər verir ki, bu sözləri Rusiya Prezidenti Vladimir Putin ölkə media sektorunun baş redaktorları ilə görüşü zamanı deyib.

"Rossiya 24" telekanalında yayımlanan toplantıda danışan Putin etiraz aksiyalarından tutmuş koronavirusla mübarizəyə qədər bir çox məsələləri qiymətləndirib. O, Rusiyanın rəqiblərinin xalqın yığılan qəzəb və narazılıq vəziyyətindən yararlandıqlarını və rusiyalı fəal Aleksey Navalnını öz maraqları üçün istifadə etdiklərini bildirib.

Rusiya lideri qeyd edib ki, ölkənin rəqibləri çoxdandır iddialı və hakimiyyətə həsrət olan insanları öz mənfəətləri üçün istifadə edirlər və hazırda baş verənlər yeni bir şey deyil:

"Burada yeni bir şey görmürük. Çoxlu qəzəb və enerji, daha çox pul qazanmaq, hakimiyyəti ələ keçirmək istəkləri. Bunların hamısı ən aktiv şəkildə istifadə olunur".

V.Putin yalnız Rusiyada deyil, digər ölkələrdə də insanların həyatının çətinləşdiyinə işarə edərək bunları deyib:

"Nə deyirsinizsə, deyin. Pandemiya var, yaşayış şərtləri də çətinləşdi. Bunun günahkarı kimdir? İdarəetmə. Bu idarəetməyə ayrılan paydır. Əlbəttə, Avropada, digər ölkələrdə, ABŞ-da da rəqib güclər bundan istifadə etməyə çalışır, bizdə də istifadə etməyə çalışdılar və istifadə etdilər də. Ölkədə bir çox problem var, hökumət səbirli olmalı, bunları həll etmək üçün "pul tökmək" əvəzinə ritmik şəkildə çalışmalıdır", - Putin əlavə edib.

Akqabay