Paytaxtda iş adamı güllələndi: Şübhəli əvvəllər Türkiyədə ittiham edilmiş ortağıdır

Yeni il gecəsi Tbilisinin mərkəzində qətl hadisəsi baş verib.

Publika.az xəbər verir ki, 50 yaşlı iş adamı 31 dekabr axşamı Mziuri Parkının yaxınlığında avtomobilində güllələnərək öldürülmüş vəziyyətdə tapılıb.

Bu barədə “Novosti-Qruziya” agentliyi məlumat yayıb.

Bir neçə saat sonra 57 yaşlı Malxaz Baqaturiya təqsirləndirilən şəxs qismində həbs edilib. O, Gürcüstan paytaxtından təxminən 250 km aralıda yerləşən Abaşa bələdiyyəsində saxlanılıb.

Axtarış zamanı şübhəlinin üzərindən qeydiyyatsız odlu silah və 25 metadon həbi tapılıb.

“TV Pirveli” bildirir ki, Baqaturiya qətlə yetirilən şəxsin dostu və biznes ortağı olub. Onlar birlikdə avtomobil hissələri ticarəti ilə məşğul olublar.

Hadisənin əsas nəzəriyyəsi pul mübahisəsidir. Baqaturiyanın tanışını "söhbətə" çağırdıqdan sonra onu güllələdiyi bildirilir.

Jurnalistlər həmçinin qətlin narkotiklə əlaqəli ola biləcəyini ehtimal edirlər. Şübhəli əvvəllər Türkiyədə narkotiklə əlaqəli cinayətlərə görə məhkum edilmişdi.

Baqaturiya Gürcüstan Cinayət Məcəlləsinin üç maddəsi ilə ittiham olunub: qanunsuz silah, narkotik saxlama və qəsdən adam öldürmə. O, 15 ilə qədər həbs cəzası ilə üzləşə bilər.

Bu gün məhkəmə təqsirləndirilən şəxs barəsində qətimkan tədbiri seçəcək. Prokurorluq onun proses bitənə qədər həbsdə qalmasını tələb edir.

Tural