Kişilər və qadınlar üçün ideal idman saatı

ABŞ-ın Nyu-York şəhərindəki Skidmore Kollecində aparılan araşdırmanın nəticələrinə görə, arıqlamaq istəyən qadın və kişilər üçün idman saatları fərqlidir. Alimlərin idmanla bağlı araşdırması “Frontiers in Physiology” jurnalında dərc olunub.

Publika.az xarici mətbuata istinadən xəbər verir ki, alimlər kişilərin və qadınların fərqli saat qurşaqlarına üstünlük verməli olduğunu irəli sürüb.

Araşdırma müəyyən edib ki, qadınlar səhər idmanı zamanı daha çox bədən yağı, axşam isə kişilər daha çox kalori yandırır. Tədqiqatçılar həmçinin hormonların, fərqli biologiyanın və cinslər arasında yuxu-oyanma dövrlərindəki fərqlərin də bu məsələyə təsir etdiyini açıqlayıb.

Araşdırmada 25-55 yaş arasında aktiv və sağlam 30 kişi və 26 qadın iştirak edib. Sınaq müddətində dartınma, qaçış, müqavimət və dözümlülük məşqlərini əhatə edən müxtəlif fitnes proqramının təsirləri izlənilib. Bir qrup saat 08:30-a qədər bir saat idman edib, digər qrup isə axşam saat 18:00-20:00 arasında eyni hərəkətləri təkrarlayıb. Bütün iştirakçılara xüsusi hazırlanmış yemək planı təqdim edilib. Tədqiqat boyu araşdırmaçılar bütün iştirakçıların qan təzyiqini və bədən yağını, həmçinin onların elastikliyini və gücünü yoxlayıblar.

Tədqiqat müəllifi və Nyu-York Skidmore Kollecində sağlamlıq və insan fiziologiyası elmləri professoru Paul Arcerionun sözlərinə görə, məşq üçün ən uyğun vaxt bunu edə biləcəyiniz və cədvəlinizə uyğunlaşdıra biləcəyiniz zamandır. Bununla belə, o, idman etmək üçün günün ideal vaxtının kişilər və qadınlar üçün fərqli olduğunu da ortaya qoyduqlarını vurğulayıb.

“Qarın yağını azaltmaq və qan təzyiqini aşağı salmaq istəyən qadınlar səhərlər idman etməlidirlər”, - professor qeyd edib.

Bununla belə, o vurğulayıb ki, ümumi əhval-ruhiyyəni və qida qəbulunu, eləcə də bədənin əzələ gücünü yaxşılaşdırmağa çalışan qadınlar axşam idmanı etməlidirlər.

Qeyd olunub ki, axşam məşqləri kişilərdə emosional rifahı, həmçinin ürək və metabolik sağlamlığı yaxşılaşdırır. Mütəxəssislər izah ediblər ki, metabolik sağlamlığın yaxşılaşdırılması piylənmə, 2-ci tip diabet, ürək xəstəliyi və insult riskini azaltmaq deməkdir.

Kişilərin və qadınların məşq vaxtı ilə bağlı cavablarının niyə bu qədər fərqli olduğu tam aydın deyil. Ekspertlər bunun üçün daha çox araşdırmaya ehtiyac olduğunu söyləyirlər. Araşdırma boyu sağlam çəkisi olan insanlar izlənsə də, tədqiqatçılar proqramın artıq çəki və ya obez insanlara da təsir edə biləcəyini vurğulayıb.