Qonşuları Harrisdən şikayət etdi: "Köçsə, ona səs verməyə hazırıq"

ABŞ-ın Demokratlar Partiyasından prezidentliyə namizəd Kamala Harrisin evinin yerləşdiyi Los-Ancelesdəki Brentvud məhəlləsinin sakinləri onun seçki kampaniyasının yaratdığı səs-küyə görə narahatdırlar.

Publika.az xəbər verir ki, bu barədə “The Wall Street Journal” yazıb.

Onlar bir şərtlə siyasətçiyə səs verməyə hazırdırlar: əgər o, həmin məhəllədən köçərsə.

Kamala Harris hazırda ABŞ-ın vitse-prezidentinin rəsmi iqamətgahında, Vaşinqtondakı “Observatory One”-da yaşasa da, onun Los-Ancelesdəki qonşuları hələ də prezidentlik yarışı ilə əlaqədar çətinliklər yaşayırlar.

Xüsusən də prezidentliyə namizədin ətrafında təhlükəsizlik tədbirlərinin gücləndirilməsi səbəbindən küçənin daim bağlanmasından, tıxacların yaranmasından şikayətlənirlər. Qonşulardan biri hətta Los-Ancelesdəki evini satıb köçmək şərti ilə Harrisə məmnuniyyətlə səs verəcəyini deyib.

Ev (325 kvadratmetr) Los-Ancelesin elit Brentvud məhəlləsində 2012-ci ildə Kamala Harrisin həyat yoldaşı Duqlas Emhoff tərəfindən alınıb və ər-arvadın birgə mülkiyyətindədir. Evin qiyməti hazırda 5 milyon dollardan çoxdur. “Los Angeles Times” xəbər verir ki, Harris vaxtaşırı Kaliforniyanın ən böyük şəhərindəki evinə baş çəkir, lakin vergi ödəyiciləri tərəfindən maliyyələşdirilən səfərləri rəsmi tədbirlər kimi gizlədir.

Akqabay