Dərman paketi gözləyən qadına kəsilmiş barmaqlar göndərildi

ABŞ-ın Kentukki ştatında yaşayan bir qadın poçtla dərman və digər tibbi ləvazimatlar gözləyib, lakin bunun əvəzinə qapısının önündə insan bədəninin hissələri olan bir qutu ilə qarşılaşıb.

Publika.az xəbər verir ki, bu barədə yerli KİV-ə rəsmi qurumlar məlumat veriblər.

Rəsmi şəxslərin açıqlamasına görə, “cərrahi hazırlıq” üçün nəzərdə tutulmuş bağlama səhvən yanlış ünvana — Kentukkinin cənub-qərbində, Tennessi ştatının Neşvil şəhərindən təxminən 120 kilometr uzaqda yerləşən Hopkinsvill şəhərinə göndərilib.

“Bəli, bu doğrudur,” - deyə Kristian dairəsinin koroneri Skott Daniel "NBC News" ilə söhbətində faktı təsdiqləyib.

“Qadın tibbi ləvazimatlar gözləyirdi, amma qutudan insan əlləri və barmaqları çıxdı. Bu bağlama cərrahların təlimi üçün nəzərdə tutulmuşdu, lakin nədənsə onun qapısına çatdırılıb”, - o əlavə edib.

Danielin sözlərinə görə, o, bu qorxulu yanlışlığa şəxsən müdaxilə edib və qalıqları nəzarətə götürərək onların düzgün ünvana qaytarılmasını təmin edib.

Xoşbəxtlikdən, qadın sonda sifariş etdiyi düzgün bağlamanı alıb.

Hüseyn İbadlı