Polşa vətəndaşlıq qaydalarını sərtləşdirir: Yeni tələblər

Polşa hökuməti vətəndaşlıq alma qaydalarını sərtləşdirməyə hazırlaşır. Dəyişikliklər ilk növbədə ölkə pasportu almaq üçün müraciət edən əcnəbilərin ən böyük qrupunu təşkil edən ukraynalılara təsir edəcək.

Publika.az xəbər verir ki, bu barədə "Rzeczpospolita" hökumətdəki mənbələrə istinadən məlumat yayıb.

Bildirilib ki, Daxili İşlər Nazirliyi yeni qanun layihəsini hazırlayıb. Layihəyə əsasən, vətəndaşlıq almaq üçün Polşada minimum yaşayış müddətinin 8 ilə çatdırılması nəzərdə tutulur.

Bundan başqa, müraciət edənlər üçün B2 səviyyəsində polyak dili imtahanı, eləcə də ölkənin tarixi, Konstitusiyası və qanunvericiliyi üzrə test tətbiq olunacaq.

Yeni qaydalara əsasən, namizədlər həmçinin loyallıq bəyannaməsi imzalamalı olacaqlar. Bu sənəd dövlətə təhlükə yaradan şəxslərin sonradan vətəndaşlıqdan məhrum edilməsinə imkan verəcək.

Qeyd edək ki, Polşanın müdafiə naziri Vladislav Kosinyak-Kamış bu günlərdə hərbi xidmət yaşında olan ukraynalıların Ukraynaya qayıdaraq Silahlı Qüvvələrdə xidmət etməli olduqlarını bildirmişdi.