Trampın qarşısında iki yol: İranla razılaşma, yoxsa yeni müharibə?

ABŞ prezidenti Donald Tramp İranla bağlı siyasətində həlledici mərhələyə çatıb.

Publika.az xəbər verir ki, bu barədə “Reuters” məlumat yayıb.

Bildirilib ki, Vaşinqton hazırda Hörmüz boğazı ilə bağlı diplomatik razılaşma ilə yeni hərbi əməliyyat arasında seçim etməyə məcburdur.

Nəşrə görə, Trampın qısamüddətli olacağını iddia etdiyi İran müharibəsi artıq altıncı ayına daxil olub. Analitiklər hesab edirlər ki, Tramp ya İran və Oman arasında müzakirə olunan və Tehrana Hörmüz boğazında müəyyən nəzarət imkanı verəcək müvəqqəti razılaşmanı qəbul etməli, ya da yeni hava zərbələri ilə münaqişəni daha da dərinləşdirməlidir.

Keçmiş Yaxın Şərq danışıqları üzrə vasitəçi Aaron David Miller bildirib ki, Tramp "pis seçimlər menyusu" ilə üz-üzə qalıb və müharibənin sonsuza qədər davam etməsinə imkan verə bilməz.

ABŞ dövlət katibi Marko Rubio isə Hörmüz boğazının İranın nəzarətində olmayan beynəlxalq su yolu kimi qalmasının vacibliyini vurğulayıb. Bununla belə, yüksək yanacaq qiymətləri və ABŞ ictimaiyyətində müharibəyə artan narazılıq Trampın siyasi manevr imkanlarını məhdudlaşdırır.

“Reuters”ə danışan mənbələrin sözlərinə görə, təklif olunan razılaşma Tehrana Fars körfəzinə daxil olan gəmilər üzərində müəyyən nəzarət səlahiyyəti verə bilər. İran rəsmiləri isə danışıqların hələ yekunlaşmadığını bildirirlər.

Analitiklər həmçinin qeyd edirlər ki, Çin, Rusiya və Şimali Koreya Vaşinqtonun addımlarını diqqətlə izləyir. Onların fikrincə, Trampın verəcəyi qərar təkcə Yaxın Şərqdə deyil, qlobal geosiyasi balans baxımından da mühüm nəticələr doğura bilər.

Müəllif: Roza