Böyük Britaniya Trampa qarşı çıxdı: Ukraynada sülh perspektivini sarsıdır

Böyük Britaniya Mühafizəkarlar Partiyasının lideri Kemi Badenok ABŞ-ın Rusiya dizel yanacağı tədarükünə qoyulan məhdudiyyətlərin yumşaldılmasına qarşı çıxıb və ABŞ prezidenti Donald Trampın Vladimir Zelenski ilə bağlı açıqlamalarını tənqid edib.

Publika.az “Sky News”a istinadla xəbər verir ki, britaniyalı siyasətçinin fikrincə, bu cür addımlar Ukraynada ədalətli və davamlı sülhün əldə edilməsini çətinləşdirə bilər.

Badenokun çıxışına Vaşinqtonun Rusiya dizel yanacağının idxalına icazə vermək qərarı və Trampın Ukrayna rəhbərliyinə qarşı ittihamları səbəb olub. Amerika prezidenti Zelenskinin münaqişənin həllini gecikdirdiyini iddia edib və Ukraynada hökumət dəyişikliyinə ehtiyac olduğu barədə fikirlər bildirib.

Badenok vurğulayıb ki, Ukraynanın gələcəyi Vaşinqtonun siyasi güzəştlərinə tabe olmamalıdır. O, həmçinin Rusiyaya qarşı məhdudiyyətlərin yumşaldılmasını və Ukrayna liderini münaqişənin uzanmasında günahlandırmağı səhv hesab etdiyini bildirib.

Britaniya Mühafizəkarlar Partiyasının lideri Rusiyanı təcavüzkar adlandırıb və Moskvaya güzəştlərin hərbi təzyiqin artmasına səbəb ola biləcəyi barədə xəbərdarlıq edib.

O, belə bir anlaşmanın digər dövlətlər üçün təhlükəli bir presedent yarada biləcəyini qiymətləndirib.

Badenok hesab edir ki, münaqişə zamanı Rusiyanı hərəkətlərinə görə mükafatlandırmaq davamlı sülh razılaşmasının əldə edilməsinə mane olacaq. O, hadisələrin belə bir gedişatının ədalətli və davamlı sülh perspektivlərini təhlükə altına alacağı barədə xəbərdarlıq edib.

Müəllif: Tural