Muzeydə öldürülənlərin sayı 19-a çatdı - VİDEO\FOTO

Tunis parlamentinin yaxınlığında yerləşən Bardo Muzeyinə edilən hücumda ölənlərin sayı 19-a çatıb.

Publika.az xarici mediaya istinadən xəbər verir ki, onlardan 17-i turistdir.

Əsgər paltarları geyinərək parlamentə daxil olan üç silahlı ətrafa atəş açıb. Silahlılar bundan sonra Bardo Muzeyinə daxil olaraq buradakı insanları girov götürüb. Məlumata görə, həyata keçirilən əməliyyat nəticəsində terrorçular öldürülüb.

Öldürülən turistlərin Polşa, İtaliya, Almaniya və İspaniya vətəndaşları olduğu bildirilir. Hücum zamanı muzeydə təxminən 200 ziyarətçi olub. Onlardan 160 nəfəri muzeyin arxa qapısından qaçsa da, digərləri girov götürülüb. BBC-nin məlumatına görə, hücum parlamentdə terrorla mübarizə qanununun müzakirə edildiyi vaxtda edilib.

Ötən ay Tunis xüsusi xidmət orqanları terror aktlarını planlaşdırmaqda ittiham olunan 32 nəfəri həbs edib. Saxlanılanların bir çoxunun Suriyada İŞİD terror təşkilatının sıralarında vuruşduğu deyilir. Muzeyə hücum edənlərin də keçmiş İŞİD-çilər olduğu ehtimal olunur.

Ömər Dağlı