Dünya

Abdullah Gül prezident olmağa hazırlaşır – İDDİA

24 Mart 2015 19:56

Türkiyənin keçmiş prezidenti Abdullah Gül siyasi partiya qurmağa hazırlaşır.

Publika.az xəbər verir ki, belə bir iddia ilə Abdullah Gülün keçmiş məsləhətçisi, “Yeni Çağ” qəzetinin yazarı Əhməd Takan köşə yazısında bildirib.

O, həmçinin iddia edib ki, Gül 2019-cu il prezident seçkisində namizəd olacaq. Baş nazirin müavini Bülent Arınçın yeni partiyanın qurulmasına dəstək verdiyini yazan Takanın sözlərinə görə, yeni partiya üçün AKP-nin yaradılmasında istifadə olunan metodlar tətbiq olunur. Deyilənə görə, Gül “Partiyanın proqramına Ərdoğanın bu günə qədər etdiklərinin əksini və AKP-nin edə bilmədiklərini yazın” şəklində təlimat verib.

Gülün yeni partiyaya sədrlik edib-etməyəcəyinin hələ dəqiqləşmədiyini yazan Takan qeyd edib ki, dəqiqləşən bir şey var: “Bu da Abdullah Gülün 2019-cu ildə prezidentliyə namizəd olması barədə planlar qurmasıdır”.

Ömər Dağlı