Ronaldo Səudiyyə Ərəbistanı liqasında qalacağını açıqladı

"Əl-Nəsr"in portuqaliyalı hücumçusu Kriştiano Ronaldo Səudiyyə Ərəbistanı çempionatında qalmağı planlaşdırdığını bəyan edib.

Publika.az xəbər verir ki, onun sözlərini jurnalist Fabrisio Romano öz "X" səhifəsində paylaşıb.

"Biz Səudiyyə Ərəbistanı ilə bir bütövük. Burada qalmaq istəyirəm. Bu ölkə məni, eləcə də ailəmi və dostlarımı qəbul etdi. Burada xoşbəxtəm, burada oynamağa davam etmək istəyirəm", - deyə Ronaldo bildirib.

Daha əvvəl ABŞ Prezidenti Donald Trampın Ronaldonu Amerikada çıxış etməyə dəvət etdiyi məlum olmuşdu.

"Ronaldo, sən bütün zamanların ən böyük oyunçusan, sən bizə Amerikada lazımsan. Elə indi yola düş, sən bizə təcili lazımsan!" — deyə Tramp bəyan edib.

Hazırda 41 yaşlı portuqaliyalı Səudiyyə Ərəbistanı liqasında "Əl-Nəsr"in şərəfini qoruyur. Fevral ayında hücumçu Səudiyyə Ərəbistanının Dövlət İnvestisiya Fondunun (PIF) klubu idarə etməsindən narazı qaldığı üçün komandanın oyunlarını boykot etmişdi. Xüsusilə, oyunçu hesab edir ki, fond "Əl-Nəsr"in rəqiblərinin transferlərinə daha çox vəsait ayırır. Hazırda Ronaldo komandanın heyətinə qayıdıb.

Portuqaliyalı ulduz 2023-cü ildən "Əl-Nəsr"də çıxış edir. Cari mövsümdə o, 24 oyun keçirib, 21 qol vurub və üç məhsuldar ötürmə edib.

Hüseyn İbadlı