CAF-dan şok qərar: Seneqalın Afrika çempionluğu əlindən alındı

Afrika Futbol Konfederasiyası (CAF) Afrika Millətlər Kubokunun final oyununda yaşanan insidentlə bağlı şok qərarlar verib.

Publika.az xəbər verir ki, Seneqal millisinə texniki məğlubiyyət verilib, turnirin qalibi isə Mərakeş millisi elan olunub. Bu barədə qurumun mətbuat xidməti məlumat yayıb.

CAF Mərakeş tərəfinin matçın nəticəsi ilə bağlı apellyasiyasını təmin edib. Buna səbəb Seneqal futbolçularının oyun zamanı meydanı tərk etməsi olub.

"Afrika Millətlər Kubokunun reqlamentinin 84-cü maddəsinə uyğun olaraq, Seneqal millisinə final matçında texniki məğlubiyyət verilib və texniki qələbə Mərakeş yığmasının xeyrinə rəsmiləşdirilib", – deyə açıqlamada qeyd olunub.

Qeyd edək ki, Seneqal və Mərakeş milliləri arasında final oyunu bu ilin yanvarın 18-də keçirilib. Matçın əsas vaxtının sonlarında Seneqal futbolçuları qapılarına təyin olunan penaltiyə etiraz edərək meydanı tərk ediblər. Təxminən 15 dəqiqəlik fasilədən sonra komandalar yenidən oyuna qayıdıb və Brahim Diasın penalti zərbəsini Eduar Mendi dəf edib. Əlavə vaxtda isə qələbə qolunu Pape Queye vuraraq Seneqal komandasını önə çıxarıb.

Heybət