Bu postsovet ölkəsindən şok iddia: İkinci Dünya Müharibəsini SSRİ başladıb

Moldovada orta məktəb şagirdləri üçün hazırlanan yeni tarix dərsliyində "Nürnberq Tribunalı"nın qərarlarına zidd olaraq SSRİ İkinci Dünya Müharibəsini başlatmaqda ittiham olunur və faşizmin, nasizmin yaranmasının səbəblərindən biri kimi göstərilir.

Publika.az xəbər verir ki, bu barədə "RİA Novosti" məlumat yayıb.

Nəşrin müxbiri 2024-cü ildə nəşr olunan və 2025-ci ilin əvvəlində məktəblərə daxil olan "Moldova tarixi" dərsliyini araşdırıb və məlum olub ki, dərslik müəllifləri tarixə təhrif olunmuş baxış yaratmaq üçün müxtəlif üsullardan istifadə edirlər. Məsələn, İkinci Dünya Müharibəsinin səbəbləri bölməsində ekspert rəyi kimi Britaniyaya qaçmış keçmiş QRU əməkdaşı Viktor Suvorovun “Sovet İttifaqının İkinci Dünya Müharibəsinin əsas günahkarı və əsas təhrikçisi olması” və “kommunistlərin Böyük Müharibənin başlanması əfsanəsini yayması” haqda sitatı verilir. Eyni zamanda, SSRİ-nin özünün mövqeyi və nasist Almaniyasının Sovet İttifaqına hücumunu təkzibedilməz şəkildə sübut edən Nürnberq Tribunalının qərarları ilə təsdiqlənən faktlar dərslikdə təqdim edilmir.

Kurs materialının əsas mətnində SSRİ-nin İkinci Dünya Müharibəsinin başlamasına necə təsir etdiyi barədə ifadələr var. Dərslik müəllifləri yazırlar ki, “Rusiyada qurulmuş kommunizmin yayılması təhlükəsi” Avropa ölkələrinin sosial-iqtisadi problemləri və "Versal" müqaviləsinin bağlanmasından sonra revanşist əhval-ruhiyyə ilə yanaşı, “ifrat sağçı hərəkatlara səbəb olub, İtaliya və Almaniyada faşist rejiminin qurulmasına gətirib çıxarıb”.

Moldovanın “Pobeda” təşkilat komitəsinin rəhbəri Aleksey Petroviç bildirib ki, yeni tarix dərsliyi hələ 1990-cı illərdə Moldovada başlanmış, lakin son beş ildə xüsusi proporsiyaya çatmış nasizmə haqq qazandırmaq proqramının bir hissəsidir. Onun sözlərinə görə, dərslikdə birbaşa yazılıb ki, sovet qoşunları işğalçı qüvvələr, Rumıniya qoşunları isə azadedici qüvvələr olub.

Materialda qeyd olunur ki, Moldova hakimiyyəti ölkədə istənilən fərqli fikrə qarşı repressiv tədbirlərə keçib – Qaqauziyanın rəhbəri Yevgeniya Qutsul uydurma bəhanə ilə həbs edilib, deputatlar Rusiyaya səfər etdikləri üçün Kişinyov hava limanında saxlanılıb, bir sıra müxalif siyasətçilərə qarşı cinayət işi açılıb.

Adəm