Türkiyə bu iki ölkəni də barışdırır: Ərdoğanın mesajı çatdırıldı

Türkiyə Sudan və Birləşmiş Ərəb Əmirlikləri (BƏƏ) arasındakı böhranın həllində vasitəçilik etmək istəyir.

Publika.az xəbər verir ki, bu barədə “Türkiyə” qəzeti diplomatik mənbələrə istinadən məlumat yayıb.

Nəşrin məlumatına görə, Əbu-Dabi bu təşəbbüsü müsbət qiymətləndirir. Bundan əvvəl BƏƏ Sudan ordusunu Əmirliyin diplomatik missiyasının rəhbərinin Xartumdakı iqamətgahına hava zərbəsi endirməkdə ittiham etmişdi. Buna cavab olaraq Sudan silahlı qüvvələri Çevik Reaksiya Qüvvələrini (RRF) ittiham edərək ittihamları rədd edib. Rusiya Xarici İşlər Nazirliyi bu cür hücumların beynəlxalq hüquqa zidd olduğunu vurğulayaraq, hadisənin araşdırılmasına çağırıb.

Türkiyə artıq vasitəçilik missiyası çərçivəsində ilk addımlarını atıb. Türkiyə xarici işlər nazirinin müavini Burhanəddin Duran Sudan rəsmiləri ilə görüşüb, prezident Rəcəb Tayyib Ərdoğan və xarici işlər naziri Hakan Fidanın mesajlarını çatdırıb. Bildirilir ki, 2024-cü ilin dekabrında Ərdoğan Sudan Suverenlik Şurasının sədri Əbdülfəttah əl-Burhanla telefonla vəziyyəti müzakirə edib və Ankaranı vasitəçi kimi təklif edib.

Qəzet diplomatik mənbələrdən sitat gətirir: “Türkiyə qardaş Sudanın birliyinə, ərazi bütövlüyünə və sabitliyinə böyük əhəmiyyət verir.

2023-cü il aprelin 15-dən Sudanda Məhəmməd Həmdan Daqlonun komandanlığı altında Çevik Reaksiya Qüvvələri ilə nizami ordu arasında ağır döyüşlər davam edir. Dinc əhalinin ölümü ilə müşayiət olunan bu toqquşmalar artıq humanitar böhrana gətirib çıxarıb. Beynəlxalq Qızıl Xaç Komitəsi xəbərdarlıq edir ki, münaqişə səhiyyə sistemlərini iflasa uğratmaq və xəstəliklərin yayılması təhlükəsi yaradır.

Türkiyə bundan əvvəl Efiopiya və Somalinin barışdırılması da daxil olmaqla sülhməramlı missiyalarda uğurla iştirak edib. İndi Ankara münaqişənin həlli üçün diplomatik yol təklif etməklə Sudan və BƏƏ arasındakı gərginliyin aradan qaldırılmasına yardım etmək niyyətindədir.

Tural