ABŞ Türkiyə ilə Rusiyanın arasını belə vurmağa çalışır: Azərbaycana da təzyiq edir ki...

ABŞ Ankaraya qarşı sanksiya təzyiqi ilə Rusiya və Türkiyə arasında parçalanma və inamsızlıq mühiti yaratmağa çalışır.

Publika.az "RİA Novosti"yə istinadən xəbər verir ki, bunu türkiyəli tarixçi və politoloq Mehmet Perinçek deyib.

“ABŞ Türkiyəyə anti-Rusiya sanksiyalarına əməl etmək baxımından təzyiq göstərməklə Türkiyə-Rusiya münasibətlərinə xələl gətirmək və inamsızlıq mühiti yaratmaq məqsədi güdür”, - deyə politoloq vurğulayıb.

Analitikin fikrincə, Vaşinqton Rusiya ilə ticarət əlaqələrini inkişaf etdirmək istəyən Çin, Hindistan, Türkiyə, Azərbaycan və bəzi Avropa İttifaqı (Aİ) ölkələrinə qarşı oxşar vasitələrdən istifadə edir.

Perinçek hesab edir ki, Moskva onun əsas ticarət tərəfdaşlarından biri olduğu üçün Ankara bu cür manipulyasiyaya məruz qalır.

Bundan əvvəl türkiyəli analitik Engin Özər Ankaranın anti-Rusiya sanksiyalarında qismən iştirak etdiyini bildirmişdi. Onun sözlərinə görə, bu, prezident Rəcəb Tayyib Ərdoğanın ABŞ-la münasibətləri normallaşdırmaq qərarından sonra başlayıb.

Adəm Abbaslı