Zelenski Rusiya ilə "hava barışığı" ideyasına CAVAB VERDİ

Ukrayna Prezidenti Volodimir Zelenski Rusiya ilə mümkün hava atəşkəsi haqda danışıb.

Publika.az xəbər verir ki, videomüraciət onun "Telegram" kanalında yayımlanıb.

Avqustun 5-də "Bloomberg" agentliyi mənbəyə istinadla xəbər verib ki, Rusiya tərəfi Ukrayna ilə qarşılıqlı hava atəşkəsi bağlamaq imkanını nəzərdən keçirir.

Zelenski bu ideyanı tənqid edib. Tam və dərhal atəşkəsin tərəfdarı olduğunu təkrarlayıb.

O əlavə edib ki, Kiyev bir çox müxtəlif atəşkəs formatlarını sınayıb, “səmada sükut” və enerji obyektlərinə zərbələri dayandırmaq variantlarını təklif edib.

"Bütün bunlar ruslar tərəfindən pozulub", - Zelenski deyib.

Ukrayna Prezidenti ABŞ lideri Donald Trampla telefon danışığından da danışıb. Zelenskinin sözlərinə görə, Amerika lideri “çox yaxşı məlumatlıdır, Rusiyanın zərbələri haqqında bilir, cəbhədəki vəziyyəti bilir”.

İyulun 14-də Tramp Ukraynadakı münaqişənin həllində irəliləyiş əldə olunmasa, Rusiya və onun ticarət tərəfdaşlarına 100% ikinci dərəcəli tariflər tətbiq edəcəyi ilə hədələyib. Amerika lideri əvvəlcə Rusiyaya atəşi dayandırmaq üçün 50 gün vaxt versə də, iyulun 28-də bu müddəti 10-12 günə qədər qısaldıb. Onun müddəti avqustun 8-də başa çatır . Çərşənbə günü, avqustun 6-da ABŞ prezidentinin xüsusi nümayəndəsi Stiv Vitkoff Rusiya rəhbərliyi ilə görüşmək üçün Moskvaya gələcək.

Hüseyn İbadlı